“Jeta e të tjerëve”… janë kthyer sërish.
Qeveria gjermane ka miratuar një rishikim të thellë të kuadrit për funksionimin e shërbimeve të inteligjencës, duke u dhënë atyre kompetenca të zgjeruara ndjeshëm për të kryer operacione të fshehta dhe për t’iu kundërvënë kërcënimeve të huaja.
Ministri i Brendshëm Alexander Dobrind i përshkroi ndryshimet si “një epokë të re” për shërbimet sekrete gjermane, të cilat deri më tani kanë qenë kryesisht të kufizuara në mbledhjen e inteligjencës.
Paketa legjislative, e cila është mbi 700 faqe e gjatë, ende duhet të miratohet nga Bundestagu pas pushimeve të verës dhe, nëse miratohet, pritet të hyjë në fuqi në fillim të vitit të ardhshëm.
Nga mbledhja e inteligjencës tek operacionet aktive
Për dekada të tëra, shërbimi i inteligjencës së jashtme BND dhe agjencia e sigurisë së brendshme BfV operuan nën kufizime të rrepta, që përjashtonin operacionet e drejtpërdrejta dhe potencialisht vdekjeprurëse, të tilla si ato të kryera nga CIA ose Mossad.
Këto kufizime lidhen me përvojën historike të diktaturës naziste dhe Gjermanisë Lindore komuniste, si dhe mbrojtjen veçanërisht të fortë të privatësisë në sistemin ligjor gjerman.
“Shërbimet e inteligjencës gjermane, deri vonë, ishin në thelb shërbime mbledhjeje inteligjence”, tha për AFP-në Peter Neumann, profesor i studimeve të sigurisë në King’s College London.
Ato kishin aftësinë për të mbledhur informacion, por ishin shumë të kufizuar në atë që mund të bënin me të.
Marrëveshjet e reja u japin shërbimeve më shumë liri për operacione jo vdekjeprurëse. Ato do të jenë në gjendje të nisin sulme kibernetike, të çaktivizojnë sistemet e informacionit jashtë vendit, të përdorura nga aktorë armiqësorë, të bllokojnë flukset financiare dhe madje të kryejnë akte sabotimi.
Vrasjet dhe çdo operacion tjetër vdekjeprurës mbetet rreptësisht i ndaluar. Në të njëjtën kohë, fuqitë për të mbledhur dhe analizuar të dhëna po zgjerohen.
Shërbimet do të jenë në gjendje të përdorin inteligjencën artificiale për të përpunuar sasi të mëdha informacioni dhe për të ruajtur disa të dhëna për një periudhë më të gjatë kohore. Projektligji rregullon gjithashtu masa të diskutueshme siç janë mbikëqyrja online dhe identifikimi i individëve.
“Lufta hibride” ruse në qendër të vëmendjes
Qeveria e kancelarit Friedrich Merz argumenton se shërbime më të forta inteligjence janë të nevojshme për t’iu kundërvënë kërcënimeve nga fuqitë e huaja armiqësore, organizatat terroriste dhe kriminelët kibernetikë.
Zyrtarët gjermanë akuzojnë Moskën për zhvillimin e një fushate “hibride” sabotimi, spiunazhi dhe dezinformimi kundër vendit, pasi Berlini është ndër mbështetësit më të rëndësishëm ushtarakë të Ukrainës.
“Jemi në mes të një konflikti hibrid jo vetëm me Rusinë, por edhe me aktorë të tjerë”, tha Mark Henrichmann, kryetar i komisionit parlamentar që mbikëqyr shërbimet e inteligjencës. Sipas tij, qëndrimi i kujdesshëm i Gjermanisë deri më tani e ka lënë atë “prapa zhvillimeve”.
Ai iu referua, ndër të tjera, zbulimit të një droni me eksplozivë në aeroportin e Leipzigut javën e kaluar.
“Po përballemi me kundërshtarë që nuk luajnë sipas rregullave. Qëllimi i tyre nuk është vetëm të ushtrojnë presion mbi Perëndimin, BE-në dhe Gjermaninë, por, idealisht, t’i gjunjëzojnë ata”, theksoi ai.
Ministri i Brendshëm Dobrid tha se reforma “mbyll hendekun me atë që është tashmë e mundur në vendet e tjera europiane” dhe i shndërron shërbimet e inteligjencës “në shërbime të vërteta sekrete”.
Reagimet
Reforma ka shkaktuar reagime të forta. Konstantin von Notz i të Gjelbërve pranoi se fuqitë e reja dhe potente justifikohen në parim për shkak të mjedisit të vështirë të sigurisë.
Në të kundërt, Shoqata për të Drejtat Civile paralajmëroi se aftësitë e reja të mbikëqyrjes dixhitale përbëjnë një “ndërhyrje të thellë në të drejtat themelore”.
Clara Binger e së Majtës e quajti reformën “historikisht të harruar dhe të papërgjegjshme”, duke argumentuar se ajo çon në krijimin e “një policie të re sekrete gjermane” dhe i shtyn fuqitë e mbikëqyrjes “përtej çdo niveli të pajtueshëm me Kushtetutën”.
Wolfgang Kubitsky i FDP-së foli për një “shkelje historike të tabuve” dhe tha se ishte e vështirë të imagjinohej që Gjykata Kushtetuese të mos ndërhynte.
E gjithë kjo të kujton kthimin e “Stasi”-t dhe shumë kanë frikë se Gjermania do të përjetojë përsëri situata të ngjashme si ato të përshkruara në botimin “Jetët e të Tjerëve”.
Source: BILD
