Teksti i plotë u publikua!
Ndërsa Donald Trump po jepte një konferencë për shtyp në prag të Samitit të G7 në Francë, zyrtarë të lartë amerikanë i informuan gazetarët mbi përmbajtjen e marrëveshjes me Iranin.
14 pikat e marrëveshjes SHBA-Iran.
Teksti i plotë i publikuar thotë:
“Shtetet e Bashkuara të Amerikës dhe Republika Islamike e Iranit kanë rënë dakord bashkërisht dhe me mirëbesim për sa vijon:
- Shtetet e Bashkuara dhe Republika Islamike e Iranit, si dhe aleatët e tyre në luftën aktuale, nënshkruajnë këtë Memorandum Mirëkuptimi (MM) për të shpallur një ndërprerje të menjëhershme dhe të përhershme të operacioneve ushtarake në të gjitha frontet, përfshirë Libanin. Në të njëjtën kohë, ato angazhohen të mos nisin asnjë luftë ose operacion ushtarak kundër njëra-tjetrës, të përmbahen nga kërcënimet ose përdorimi i forcës dhe të sigurojnë integritetin territorial dhe sovranitetin e Libanit. Marrëveshja përfundimtare do të konfirmojë përfundimin e përhershëm të luftës në të gjitha frontet, si dhe dispozitat e mbetura të këtij paragrafi.
- Të dyja palët angazhohen të respektojnë reciprokisht sovranitetin dhe integritetin territorial të palës tjetër dhe të mos ndërhyjnë në punët e saj të brendshme.
- Shtetet e Bashkuara dhe Irani angazhohen të negociojnë dhe të përfundojnë marrëveshjen përfundimtare brenda 60 ditëve më së voni, me mundësinë e zgjatjes me pëlqim të ndërsjellë.
- Me nënshkrimin e këtij Memorandumi, Shtetet e Bashkuara do të fillojnë menjëherë procesin e heqjes së bllokadës detare dhe çdo pengesë ose kufizim tjetër kundër Iranit, dhe bllokada do të hiqet plotësisht brenda 30 ditëve. Gjatë kësaj periudhe, trafiku detar do të rikthehet gradualisht në nivelet e para luftës. Përveç kësaj, Shtetet e Bashkuara janë të angazhuara për të larguar forcat e tyre nga zonat pranë Iranit brenda 30 ditëve nga marrëveshja përfundimtare.
- Pas nënshkrimit të këtij Memorandumi, Irani do të bëjë çdo përpjekje për të siguruar kalimin e sigurt dhe të papenguar të anijeve tregtare nga Gjiri Persik në Detin e Omanit dhe anasjelltas për një periudhë prej 60 ditësh. Lundrimi tregtar do të rifillojë menjëherë, dhe rivendosja e plotë e trafikut do të përfundojë brenda 30 ditëve, duke marrë parasysh pastrimin e minave dhe heqjen e pengesave teknike ose ushtarake. Irani do të angazhohet në dialog me Sulltanatin e Omanit dhe shtetet e tjera bregdetare të Gjirit mbi menaxhimin e ardhshëm dhe shërbimet detare në Ngushticën e Hormuzit, në përputhje me ligjin ndërkombëtar.
- Shtetet e Bashkuara angazhohen, në bashkëpunim me partnerët rajonalë, të zhvillojnë një plan përfundimtar prej të paktën 300 miliardë dollarësh për rindërtimin dhe zhvillimin ekonomik të Iranit. Mekanizmi për zbatimin e planit do të specifikohet në marrëveshjen përfundimtare brenda 60 ditëve. Shtetet e Bashkuara do të sigurojë të gjitha liçencat dhe miratimet e nevojshme për transaksionet financiare përkatëse.
- Shtetet e Bashkuara zotohen të heqin të gjitha format e sanksioneve kundër Iranit, duke përfshirë rezolutat e Këshillit të Sigurimit të OKB-së, rezolutat e Bordit të Guvernatorëve të IAEA-së dhe të gjitha sanksionet e njëanshme të SHBA-së, parësore dhe dytësore, sipas një orari që do të miratohet si pjesë e marrëveshjes përfundimtare. Të dyja palët e njohin rëndësinë kritike të kësaj çështjeje dhe shprehin qëllimin e tyre për ta adresuar atë menjëherë në negociata.
- Irani riafirmon se nuk do të blejë ose zhvillojë armë bërthamore. Të dyja palët ranë dakord të zgjidhin çështjen e rezervave të tij të materialit bërthamor të pasuruar përmes një mekanizmi të dakorduar reciprokisht, me një kërkesë minimale për hollimin në vend të materialit nën mbikëqyrjen e Agjencisë Ndërkombëtare të Energjisë Atomike. Do të zhvillohen gjithashtu diskutime mbi pasurimin e uraniumit të Iranit dhe nevojat e tjera bërthamore si pjesë e një marrëveshjeje përfundimtare të pranueshme reciprokisht.
- Derisa të arrihet një marrëveshje përfundimtare, të dyja palët bien dakord të ruajnë status quo-në. Irani do të ruajë nivelin aktual të programit të tij bërthamor dhe Shtetet e Bashkuara nuk do të vendosin sanksione të reja ose nuk do të vendosin forca ushtarake shtesë në rajon.
- Shtetet e Bashkuara zotohen që menjëherë pas nënshkrimit të Memorandumit dhe deri në… Nëse sanksionet hiqen plotësisht, Departamenti i Thesarit i SHBA-së do të lëshojë përjashtime për eksportet e naftës bruto iraniane, produkteve të naftës dhe derivateve të tyre, si dhe për të gjitha shërbimet përkatëse, duke përfshirë bankat, sigurimet dhe transportin.
- Shtetet e Bashkuara angazhohen të vënë në dispozicion për përdorim fondet dhe asetet e ngrira ose të kufizuara të Iranit pas zbatimit të Memorandumit. Procedurat për lirimin do të bien dakord reciprokisht gjatë negociatave. Këto fonde do të jenë plotësisht të disponueshme për pagesa për përfituesit e caktuar nga Banka Qendrore e Iranit. Shtetet e Bashkuara do të lëshojnë të gjitha liçencat dhe miratimet e nevojshme.
- Të dy vendet bien dakord të krijojnë një mekanizëm monitorimi ekzekutiv për të mbikëqyrur zbatimin e këtij Memorandumi dhe pajtueshmërinë me marrëveshjen përfundimtare.
- Pas nënshkrimit të Memorandumit, dhe me kusht që zbatimi i paragrafëve 1, 4, 5, 10 dhe 11 të fillojë dhe të vazhdojë pa probleme, të dy palët do të hyjnë në negociata për një marrëveshje përfundimtare ekskluzivisht mbi çështjet e mbetura.
- Marrëveshja përfundimtare do të ratifikohet përmes një rezolute detyruese të Këshillit të Sigurimit të OKB-së.
Source: Department of State USA
