Dronë ukrainasë goditën 12 anije çisterna ruse në Detin Azov, tha ushtria ukrainase, në sulmin e fundit të madh në një fushatë që synonte ndërprerjen e furnizimeve me karburant për forcat ruse dhe izolimin e Krimesë së pushtuar nga Rusia.
Anijet u përdorën për të furnizuar me karburant ushtrinë ruse dhe për të transportuar naftë dhe produkte nafte, duke anashkaluar sanksionet ndërkombëtare, tha shtabi i përgjithshëm i ushtrisë ukrainase, duke shtuar se u goditën gjithashtu një rimorkiator dhe një anije mallrash të thata.
Sulmet e çojnë numrin e anijeve ruse të synuara nga forcat ukrainase në Detin Azov dhe Detin e Zi, në katër ditët e fundit, në 36, sipas Ministrisë së Mbrojtjes në Kiev. Ato përfshijnë 32 të ashtuquajtura anije cisternë të “flotës në hije” ruse dhe dy anije mallrash të thata. “Të gjitha po përpiqeshin të transportonin karburant në Krime”, tha deklarata.
Ukraina ka shtuar sulmet ndaj infrastrukturës së furnizimit dhe energjisë në Krime në javët e fundit, duke çuar në mungesë karburanti dhe duke bërë që autoritetet ruse të shpallin gjendje të jashtëzakonshme në gadishull, një qendër kritike për përpjekjet e luftës së Moskës.
Fushata shton një pikë tjetër të mundshme presioni për tregjet e naftës, e cila tashmë është përqendruar në rrezikun e ndërprerjeve të furnizimit në Gjirin Persik dhe sigurinë e rrugëve kryesore tregtare detare.
Në një intervistë me Reuters muajin e kaluar, komandanti kryesor i dronëve të Kievit, Robert Brovdy, u zotua të shkëpusë në mënyrë efektive Krimenë nga Rusia përmes një fushate të vazhdueshme sulmesh.
Zëdhënësi i Kremlinit, Dmitri Peskov, tha dje se Shtetet e Bashkuara gabohen nëse besojnë se sulmet ukrainase thellë brenda territorit rus mund të ndihmojnë në përfundimin e një lufte që ka vazhduar për më shumë se katër vite dhe paralajmëroi se këto goditje mund ta zgjasin atë.
Duke folur në samitin e NATO-s në Turqi, të mërkurën, Sekretari i Shtetit i SHBA-së Marco Rubio, tha se Rusia po luftonte për të mbrojtur qiellin e saj, duke shtuar se kjo “shpresojmë të krijojë më shumë hapësirë për negociata” për t’i dhënë fund luftës.
Presidenti i SHBA-së, Donald Trump, tha: “Është një përshkallëzim, por është gjithashtu një përshkallëzim që mund të ndihmojë në përfundimin e saj”.
I pyetur për deklaratat e tyre, Peskov u tha gazetarëve se kishte “disa keqkuptime brenda Shtëpisë së Bardhë… rreth idesë se përshkallëzimi dhe presioni ushtarak mund të ndihmojnë në hapjen e rrugës për një zgjidhje paqësore”. Ai tha se ky ishte një supozim i gabuar, duke shtuar se ajo që Rusia e quan një “operacion ushtarak special” në Ukrainë mund të vazhdojë për më gjatë si rezultat i goditjeve ukrainase.
Tre burime pranë Kremlinit i thanë Reuters se Presidenti Vladimir Putin po i hedh poshtë thirrjet për bisedime paqeje me Kievin dhe se sulmet e fundit nga dronë ukrainasë ndaj rafinerive dhe porteve ruse të naftës kanë forcuar vendosmërinë e tij për të vazhduar luftën. Ata shtuan se Putini ka të ngjarë ta përshkallëzojë konfliktin.
Një nga njerëzit, i cili takohet rregullisht me presidentin, përshkroi një “probabilitet të lartë” të përshkallëzimit në muajt e ardhshëm. I pyetur në lidhje me vendimin e Trump për të lejuar Ukrainën të ndërtojë interceptorë të mbrojtjes ajrore Patriot me liçencë, Peskov tha se Moska nuk ka iluzione në lidhje me furnizimet e armëve amerikane në Kiev.
“Ne nuk e shohim situatën përmes syzeve rozë dhe Presidenti Putin e di shumë mirë këtë. Në të njëjtën kohë, ekziston një lloj dualiteti në qëndrimin e SHBA-së: ndryshe nga europianët, Shtetet e Bashkuara ruajnë një dëshirë për të lehtësuar një lëvizje drejt një proçesi paqeje. Ata mund të gabohen ose të çorientohen ndonjëherë, por kjo dëshirë na duket e sinqertë.”
Source: Reuters
