Rendi është rivendosur në Burgun e Koridhalos, pas tensionit që ndodhi të premten në mëngjes në krahun e 5-të të burgut, ku të burgosurit turq vazhduan të mobilizoheshin, duke i vënë flakën dyshekëve dhe objekteve në qelitë e tyre.
Sipas informacioneve nga burimet policore, trazirat thuhet se filluan pas vendimit për të transferuar një nga bashkëkombasit e tyre në aeroport, me qëllim përfundimin e proçesit të ekstradimit të tij në Turqi. Ky zhvillim specifik duket se ka provokuar një reagim të fortë nga disa të burgosur, me situatën që u përshkallëzua shpejt.
Tensioni që mbizotëroi në repart mori përmasa më të mëdha kur të burgosurit ndezën zjarre në qeli, duke rezultuar në një atmosferë mbytëse nga tymi i dendur që filloi të përhapej në të gjithë ambientet e burgut. Incidenti shkaktoi trazira, duke mobilizuar menjëherë autoritetet kompetente.
Forca të mëdha të Policisë Greke dhe Shërbimit të Zjarrfikësve nxituan në vendngjarje për të kontrolluar situatën dhe për të parandaluar përshkallëzimin e mëtejshëm.
Gjithsej 15 zjarrfikës me pesë automjete u përpoqën të përballonin zjarrin, duke arritur të kufizonin shpërthimin dhe ta vinin nën kontroll incidentin.
Ndërhyrja e autoriteteve çoi në uljen e tensionit dhe në rivendosjen e plotë të funksionimit normal në burg. Pavarësisht incidentit, proçesi i transferimit të të burgosurit turk në aeroport, sipas të njëjtave burime, vazhdoi normalisht.
Shërbimet kompetente tani po hetojnë shkaqet e sakta që çuan në trazirë, ndërsa në të njëjtën kohë po shqyrtojnë shkallën e dëmit të shkaktuar në ambientet e krahut të 5-të nga zjarri dhe dëmet që ndodhën.
Source: Europost
