Skena kaosi në Massachusetts teksa një “killer” me mitraloz qëllon pa dallim mbi automjetet që kalonin në rrugë.
Autori qëlloi mbi automjetet që kalonin në Kembrixh dhe u plagos nga një oficer policie dhe një qytetar.
Tani më është i shtruar në spital në kujdes intensiv.
Një incident me të shtëna që ndodhi në mesditë të së hënës (5/11) në një autostradë të Massachusetts ka tronditur Shtetet e Bashkuara, kur një burrë hapi zjarr me mitraloz mbi automjetet që kalonin, duke plagosur gjithsej njëmbëdhjetë persona.
Sipas autoriteteve, 46-vjeçari Tyler Brown nga Bostoni doli në mes të rrugës në zonën e Kembrixhit dhe filloi të qëllonte pa dallim, dhjetëra plumba, duke goditur të paktën një duzinë automjetesh që lëviznin në vendngjarje.
Skenat e kapura nga kamerat dhe dëshmitarët okularë janë tronditëse, pasi autori dyshohet se qëlloi ndërsa lëvizte në këmbë, pa hasur rezistencë të menjëhershme në minutat e para të sulmit.
Ndërhyrja e një oficeri të Policisë së Shtetit dhe një civili, një veteran i Marinës me leje për armë zjarri, rezultoi vendimtare. Të dy qëlluan autorin e krimit, duke e plagosur në gjymtyrë, ndërsa më pas i dhanë ndihmën e parë derisa u transferua në një spital të Bostonit, ku po trajtohet në njësinë e kujdesit intensiv.
Prokurorët thanë se Brown përballet me akuza, përfshirë tentativë vrasjeje, ndërsa hetimi për motivet e tij është duke vazhduar.
Sipas autoriteteve, incidenti zgjati vetëm disa minuta, por shkaktoi panik të madh, me shoferë dhe kalimtarë që përpiqeshin të fshiheshin për t’i shpëtuar të shtënave.
Dëshmitarët përshkruajnë skena kaosi, me automjete të palëvizura në rrugë dhe njerëz që vraponin në panik për jetën e tyre, ndërsa dëgjoheshin të shtëna të vazhdueshme.
Tyler Brown është i njohur për autoritetet, pasi ai është dënuar më parë për vepra të dhunshme penale dhe kishte vuajtur një dënim me burg për përpjekje për të sulmuar oficerët e policisë.
Rasti ka shkaktuar reagime të forta në SHBA, duke ringjallur diskutimin rreth pronësisë së armëve nga persona të dënuar, apo me të shkuar penale dhe sigurisë në vendet publike, ndërsa hetimi i autoriteteve vazhdon për të sqaruar të gjitha rrethanat e incidentit.
Sources:
CBS News Boston
