“Tani për tani, admirimi im nuk po shtohet të”, thotë kancelari Friedrich Merz për Amerikën.
Kancelari gjerman Friedrich Merz tha të premten se nuk do t’i këshillonte më të rinjtë të shpërnguleshin në SHBA për punë ose studime, duke përmendur atë që ai e përshkroi si “klimë sociale” në përkeqësim në Amerikë.
Duke folur në një takim të katolikëve gjermanë në qytetin jugperëndimor të Würzburgut, Merz tha: “Nuk do t’u rekomandoja fëmijëve të mi sot që të shkojnë në SHBA për t’u arsimuar dhe për të punuar” – një vërejtje që shkaktoi duartrokitje nga publiku.
Kancelari shpjegoi se “klima sociale që është krijuar papritmas” në SHBA është bërë thellësisht shqetësuese dhe argumentoi se “edhe më të arsimuarit në Amerikë kanë vështirësi të mëdha në gjetjen e një pune”. Merz, i cili është katolik, ka tre fëmijë dhe shtatë nipër dhe mbesa.
“Unë jam një admirues i madh i Amerikës”, shtoi Merz, duke shkaktuar të qeshura nga turma, “por tani për tani admirimi im nuk po shtohet”.
Komentet theksojnë përçarjen në rritje midis Berlinit dhe Uashingtonit pas javësh përplasjesh publike midis Merz dhe Presidentit Donald Trump.
Udhëheqësi gjerman – i cili më parë drejtoi Atlantik-Brücke, një rrjet me ndikim që promovon lidhjet SHBA-Gjermani – u tha nxënësve të një shkolle më 28 prill se presidenti amerikan ishte “poshtëruar” nga Irani dhe i mungonte një strategji koherente për luftën që shpërtheu në fund të shkurtit, pas sulmeve të përbashkëta SHBA-Izrael ndaj objektivave iraniane.
Tre ditë më vonë, më 1 maj, Pentagoni, duke pasuar një kërcënim të mëparshëm nga Trump, njoftoi se do të tërhiqte 5,000 trupa amerikane nga Gjermania.
Pavarësisht tensioneve, Merz shkroi në X të premten se pati “një telefonatë të mirë” me Trump-in, duke theksuar më pas se “SHBA-të dhe Gjermania janë partnerë të fortë në një NATO të fortë”.
Berlini ka hedhur poshtë gjithashtu kërkesat e SHBA-së që NATO të përfshihet drejtpërdrejt në luftën e Iranit, duke këmbëngulur se “nuk është lufta e NATO-s”, ndërsa lë të hapur vetëm një rol të kufizuar për minapastruesit gjermanë në Ngushticën e Hormuzit pasi të mbarojnë luftimet.
Megjithatë, administrata Trump ka pikëpamjen e vet për klimën politike të Europës.
Në Strategjinë e saj të Sigurisë Kombëtare të botuar në dhjetor të vitit të kaluar, Uashingtoni paralajmëroi se Europa përballet me “fshirje të mundshme të civilizimit” të nxitur nga migrimi, dobësimi i identiteteve kombëtare dhe politikat e BE-së që dyshohet se minojnë sovranitetin e vendeve.
Source: Politico
