Vendimi i Gjykatës së Apelit më 7 korrik do të vendosë fatin politik të Marine Le Pen.
Megjithatë, presidentja e re e Tubimit Kombëtar po përpiqet tashmë të fitojë një profil presidencial.
Franca tani ka një kalendar zyrtar zgjedhor për epokën pas Macron: raundi i parë i zgjedhjeve presidenciale do të mbahet më 18 prill 2027 dhe i dyti më 2 maj, duke hapur zyrtarisht garën për të pasuar presidentin që nuk mund të kërkojë një mandat të tretë.
Më 7 korrik, Gjykata e Apelit do të vendosë nëse do të mbështesë skualifikimin pesëvjeçar të vendosur ndaj Marine Le Pen të ekstremit të djathtë për keqpërdorim të fondeve të BE-së. Vendimi jo vetëm që do të përcaktojë të ardhmen personale politike të Le Pen, por gjithashtu mund të riformësojë të gjithë garën presidenciale, me kryetarin 30-vjeçar të partisë Tubimi Kombëtar, Jordan Bardella, që do të dalë si kandidat i saj.
Me sondazhet që e tregojnë Tubimin Kombëtar si kampin më të fortë politik dhe Bardella që shfaqet, në disa skenarë, edhe më popullor se Le Pen, politikani i ri tashmë po përpiqet të krijojë një profil presidencial. Udhëtimet jashtë vendit, kontaktet me qarqet e biznesit dhe ndërhyrjet në çështje kritike, siç është sistemi i pensioneve, krijojnë imazhin e një politikani që po përgatitet për çdo eventualitet. Në të njëjtën kohë, megjithatë, përpjekja e tij për të fituar autonomi politike po zbulon edhe divergjencat e para nga linja e Le Pen.
Siç raporton Financial Times, Marine Le Pen ka kaluar vite duke u siguruar që e djathta ekstreme franceze të flasë me një zë të sajin. Perspektiva e përjashtimit nga zgjedhjet presidenciale të vitit të ardhshëm po e detyron Tubimin Kombëtar (RN) të përballet me faktin nëse Bardella mund të diversifikojë linjën e vet politike.
“Është një akt i vështirë balancimi për Jordan”, tha Jean-Philippe Tanguy, një zyrtar i lartë i RN dhe deputet. “Ai nuk mund të rrijë dhe të presë… Ai duhet të krijojë hapësirën e tij politike, por çdo herë që e bën kjo perceptohet si një sulm ndaj saj.”
Vendimi i javës së ardhshme do të formësojë garën presidenciale përtej Tubimit Kombëtar, pasi rivalë të tillë si ish kryeministri i krahut të djathtë Edouard Philippe dhe i ekstremit të majtë Jean-Luc Mélenchon presin të shohin se me kë do të përballen përpara se të finalizojnë strategjinë e tyre. Le Pen e ngriti shpejt Jordan Bardella në hierarkinë e partisë, por dënimi i saj vitin e kaluar ndryshoi ekuilibrin. Ndërsa për çështje kyçe si emigracioni, krimi dhe BE-ja, nuk ka ndonjë ndryshim të konsiderueshëm në qëndrimet e tyre, për ekonominë ka nuanca të ndryshme. Bardella ka lënë të kuptohet se mund të ketë një ndryshim në qëndrimin e partisë mbi moshën e daljes në pension – një nga çështjet më shpërthyese në politikën franceze – dhe disa po e interpretojnë këtë veprim si një përpjekje për të përcaktuar hapësirën e tij dhe ndoshta si një pretekst për të rihapur një debat të pakëndshëm rreth besueshmërisë fiskale të partisë.
Si Bardella ashtu edhe Le Pen janë përpara në pothuajse të gjitha sondazhet e opinionit kundër çdo kundërshtari në raundin e parë të zgjedhjeve presidenciale dhe, në disa skenarë, në raundin e dytë.
Me interes është një studim i cituar nga “Nouvelle Observateur” në të cilin eksperti i komunikimit Raphael Lorca hartëzon pikat e dobëta të Bardella. Studimi arrin në përfundimin se, pavarësisht dominimit të tij aktual në sondazhe, imazhi i tij politik nuk është i paprekshëm. Votuesit e tij i njohin dobësitë e tij – mungesën e përvojës, mungesën e një karriere jashtë politikës dhe imazhin e tij tepër të kujdesshëm të komunikimit – por për momentin ata zgjedhin t’i injorojnë ato. Megjithatë, aftësia e tij për t’u bërë thirrje njëkohësisht si bazës popullore, ashtu edhe bazës më të pasur elektorale të krahut të djathtë, mund të bëhet një disavantazh, pasi një fushatë presidenciale do ta detyrojë atë të zgjedhë se cilin imazh do të projektojë.
Për pasojë prezenca dhe kandidimi i Marine Le Pen e sigurojnë të djathtën franceze për fitoren thuajse të sigurtë. Ndaj dhe e djathta mendon që gjyqi ndaj saj është thjesht dhe vetëm politik.
Source: Financial Time / Nouvelle Observateur
