Në pritje të artilerisë nga Turqia.
Një dorëzim i ri, i dytë, i automjeteve të blinduara luftarake Stryker iu bë Maqedonisë së Veriut nga SHBA-të si pjesë e krijimit të forcave të reja me pajisje moderne në përputhje me standardet e NATO-s, shkruan një botim serb.
Dërgesa e re ushtarake, siç është njoftuar, është pjesë e kontratës midis SHBA-së dhe Shkupit për furnizimin me automjete të blinduara, që përfaqëson një nga projektet më të rëndësishme për modernizimin e aftësive të saj mbrojtëse.
Furnizimi me automjete “Stryker”, siç u përmend, do të kontribuojë në rritjen e lëvizshmërisë, mbrojtjes dhe aftësive operacionale të Ushtrisë Tokësore, në përputhje me standardet e NATO-s.
Ministri i Mbrojtjes në qeverinë e Shkupit, Vlado Mishilovski, deklaroi së fundmi se dërgesa e dytë e automjeteve të blinduara nga SHBA-të, që nga dërgesa e parë në shkurt të këtij viti, përfundon të gjithë procesin e zbatimit të marrëveshjes me SHBA-në me vlerë gati 339 milionë euro.
Me këtë marrëveshje, siç konfirmoi Mishilovski, pritet furnizimi me armë të lehta këmbësorie, sisteme pa pilot “Puma” dhe “Raven”, pajisje për mbrojtjen kibernetike të njësive të Grupit të Batalionit të Këmbësorisë së Lehtë, pajisje për mbrojtjen kibernetike të Ministrisë së Mbrojtjes, pajisje për JTAC për mbështetje të afërt ajrore, pajisje radioje, superstrukturë të Qendrës së Simulimit në Veles.
Qeveria e Shkupit nënshkroi gjithashtu një marrëveshje me SHBA-në për furnizimin e sistemit antitank Javelin dhe automjeteve JLTV.
Si pjesë e proçesit të pajisjes më të shpejtë të njësive të Ushtrisë, pritet që sistemet e artilerisë “Boran” nga Turqia, si dhe një pjesë e pajisjeve “Mistral 3”, të dorëzohen deri në fund të këtij viti.
Source: Anadolu Ajansi
