Projekti “Skythen” i Rusisë! Pse po e tmerron Europën dhe NATO-n?
Ky është plani përfundimtar për “të hedhur në erë” planetin. Si po përgatitet Moska që të ndryshojë korrelacionet?
Rusia po punon në një projekt sekret ushtarak, të koduar si “Skythen”, për të instaluar raketa bërthamore në shtratin e detit, raportuan transmetuesit gjermanë WDR dhe NDR më 21 maj 2026, pas një hetimi disamujor, sipas faqes së internetit gjermane tagesschau.
Ky program i tmerrshëm do t’i lejonte Rusisë “të fshihte” raketat balistike në thellësi prej disa qindra metrash në oqeane dhe t’i aktivizonte ato nga distanca, thanë ekspertët gjermanë, duke cituar burime të inteligjencës perëndimore.
Kjo do ta bënte të vështirë për NATO-n të zbulonte ose godiste platformat sekrete ruse të lëshimit të raketave në kohë lufte.
Stacionet televizive WDR dhe NDR analizuan imazhe satelitore, baza të dhënash shkencore ruse dhe dokumente historike dhe folën me oficerë dhe ekspertë ushtarakë gjatë hetimit, thanë transmetuesit. Shërbimet e inteligjencës po monitorojnë një anije ruse të quajtur “Zvezdochka” në lidhje me programin.
“Zvezdochka” një anije e specializuar 96 metra e gjatë dhe 18 metra e gjerë, është e stacionuar në Severodvinsk, një qytet ndërtimi anijesh në Rusinë veriperëndimore në Detin e Bardhë.
Është projektuar për të transportuar pajisje të rënda në det të hapur me vinça dhe rampa ngarkimi, duke përfshirë edhe ujërat e akullta të veriut. Një nëndetëse speciale e quajtur “Sarov” mund të përdoret gjithashtu në planin rus.
Raketa Skif
NATO e ka identifikuar raketën që po zhvillohet për projektin si Skif, një version i modifikuar i raketës Sineva që armatos nëndetëset ruse, raportuan WDR dhe NDR. Raketat Skif thuhet se janë të afta të lëshohen nga shtrati i detit dhe kanë një rreze veprimi deri në disa mijëra kilometra.
Testet e para besohet se kanë ndodhur disa vite më parë. Viktor Bondarev, ish kreu i Forcave Hapësinore të Rusisë, i tha një agjencie lajmesh ruse në vitin 2017 se “raketa Skif, të cilat janë të fshehura në shtratin e detit, janë pjesë e arsenalit të forcave të armatosura ruse”.
Logjika strategjike dhe precedenti i Luftës së Ftohtë
Helge Adrians, një oficer detar dhe studiues në Institutin Gjerman për Çështje Ndërkombëtare dhe të Sigurisë (SWP), tha se qasja në shtratin e detit do t’i lejonte Rusisë të ruante frenimin bërthamor me më pak nëndetëse.
“Vendosja e raketave balistike ndërkontinentale (ICBM) në shtratin e detit dhe mbajtja e tyre në gjendje operacionale ka dy avantazhe të mëdha, sipas mendimit tim”, tha Adrians, duke shtuar: “Së pari, neutralizimi i tyre duket shumë i vështirë. Së dyti, ky proçes ofron mundësinë e shpëtimit të nëndetëseve dhe personelit të tyre”.
Pentagoni amerikan studioi një ide të ngjashme në vitin 1980 nën emrin e koduar “Orca”, me një skicë të një modeli të një silo raketash të ankoruar në shtratin e detit që do të shkëputej, do të ngrihej në sipërfaqe dhe do të lëshonte raketën në rast lufte, raportuan WDR dhe NDR.
Ushtria amerikane përfundimisht e braktisi idenë, duke përmendur vështirësi në transmetimin e të dhënave në raketat në shtratin e detit, ose në kontrollimin e gatishmërisë së tyre pa zbuluar vendndodhjen, raportuan transmetuesit.
Kufizimet dhe përgjigjet e traktatit
Një traktat ndërkombëtar i vitit 1971, Traktati i Shtratit të Detit, ndalon vendosjen e armëve bërthamore në shtratin e detit në ujërat ndërkombëtare, por nuk mbulon zonat bregdetare të një shteti. Projekti “Skythen” do të përfshinte vendosjen e raketave në ujërat ruse, raportuan transmetuesit.
NATO dhe Ministria Ruse e Mbrojtjes refuzuan të komentonin mbi projektin. Ambasada ruse në Berlin tha se nuk kishte informacion mbi këtë çështje.
Sipas inteligjencës së NATO-s, raketat do të vendoseshin në silose ose kontejnerë të posaçëm në thellësi prej qindra metrash, ku ato do të mund të qëndronin të fshehura në gjendje gatishmërie për vite me radhë dhe të lëshoheshin nga distanca me telekomandë në rast krize.
Vendosja e raketave në shtratin e detit i lejon Moskës të ruajë aftësitë e parandalimit bërthamor me një kosto dukshëm më të ulët, duke zvogëluar varësinë e saj nga nëndetëset ushtarake të shtrenjta. Përveç kësaj, bazat fikse në shtratin e detit janë jashtëzakonisht të vështira për NATO-n, për t’u zbuluar ose për t’u shkatërruar në rast lufte.
Source: WDR / NDR
