Thatësira e zgjatur në Europë ka zbuluar flotën e fundosur të Hitlerit.
Anije luftarake naziste gjermane kanë dalë në sipërfaqe në Danub, duke zgjuar kujtime të Luftës së Dytë Botërore.
Thatësira e zgjatur që përfshiu kontinentin europian ka nxjerrë në dritë sekretet e varrosura të Luftës së Dytë Botërore. Ujërat e Danubit janë tërhequr në mënyrë dramatike, duke rezultuar në shfaqjen, pranë Prahovos, Serbi, të një “flote të tërë fantazmë”, të përbërë nga anije luftarake gjermane që u fundosën në vitin 1944.
Fenomeni natyror i rënies së nivelit të lumit është shndërruar në një makinë kohe të hapur, duke zbuluar dhjetëra anije të mbytura që mbeten të shpërndara dhe ende krijojnë pengesa serioze për lundrimin e lirë në rajon.
Ultimati i Hitlerit për Ushtrinë e Kuqe
Historia pas kufomave të ndryshkura na kthen 80 vite prapa, në ditët e errëta të rënies së Rajhut të Tretë. Në vjeshtën e vitit 1944, Gjermania naziste ishte në tërheqje të plotë përballë përparimit të pandalshëm të Ushtrisë së Kuqe.
Komanda e lartë kishte lëshuar urdhra të qartë dhe të rreptë: Asnjë pajisje ushtarake nuk duhej të binte në duart e armikut.
Ekuipazhet e armatës detare gjermane që vepronte në lumin e dytë më të madh në Europë e gjetën veten në një rrugë pa krye. Duke zbatuar urdhrat, ata vazhduan të fundosnin qëllimisht anijet e tyre. Ky veprim nuk kishte për qëllim vetëm shkatërrimin e materialit, por gjithashtu i shërbente një objektivi të qartë taktik: të krijonte një barrierë artificiale nga anijet e mbytura, e cila do të bllokonte korridorin e transportit detar dhe do të vononte përparimin e forcave sovjetike përgjatë lumit.
Operacioni i shpëtimit dhe makthi i eksplozivëve
Ky truk lufte i vitit 1944 vazhdon të prekë transportin modern tregtar. Deri në gusht të vitit 2022, valët e nxehtësisë kishin zbuluar tashmë kufomat e para, duke mobilizuar mekanizmin europian. Një projekt i madh, me mbështetjen strategjike të Bankës Europiane të Investimeve (BEI), ndërmori shpëtimin e 21 anijeve më problematike të mbytura që bllokonin një kalim të ngushtë prej pesë kilometrash.
Megjithatë, operacioni i pastrimit të Danubit, i cili pritet të përfundojë në vitin 2028, fsheh rreziqe vdekjeprurëse. Ekspertët vlerësojnë se rreth 200 anije, nga barkat deri te rimorkiatorët e rëndë, mbeten në tabanin e lumit. Proçesi i largimit të tyre përshkruhet si jashtëzakonisht i vështirë dhe i rrezikshëm, pasi shumica e këtyre anijeve të armatosura ende mbajnë municione të gjalla dhe eksplozivë në hambaret e tyre, duke e shndërruar çdo përpjekje për rikuperim, në një mision të rrezikshëm për asgjësimin e bombave.
Source: Reuters
