“Menduan se ishin fishekzjarre!”
Një grua 22-vjeçare e vdekur nga të shtënat në një ‘rave party’.
Pesë persona të tjerë të plagosur, disa rëndë.
Pjesëmarrësit fillimisht menduan se dëgjuan fishekzjarre.
Autoritetet në Zvicër kanë nisur një kërkim për të identifikuar dhe arrestuar autorët e të shtënave që ndodhën në orët e para të së dielës në një festë ‘rave’ në qytetin e Aaraut.
Një grua 22-vjeçare u vra nga të shtënat, ndërsa pesë persona të tjerë u plagosën. Disa nga të plagosurit janë shtruar në spital në gjendje të rëndë.
Sipas mediave zvicerane, të shtënat ndodhën rreth orës 3 të mëngjesit, ndërsa afërsisht 3,500 persona ishin në festën ‘rave’.
Policia kantonale e Aargaut njoftoi nëpërmjet platformës X se 22-vjeçarja kishte ndërruar jetë nga plagët e marra. Katër burra dhe një grua të moshave nga 24 deri në 27 vjeç po trajtohen gjithashtu për lëndime që variojnë nga të lehta deri në serioze.
Rrethanat e sakta të incidentit të përgjakshëm janë ende nën hetim.
“Motivet dhe rrethanat e sakta të incidentit nuk janë sqaruar ende”, tha një zëdhënës i policisë, pa specifikuar numrin e autorëve ose llojin e armëve të përdorura.
Dëshmitarët okularë i thanë gazetës Blick se kur u dëgjuan të shtënat, disa kalimtarë fillimisht menduan se ishin fishekzjarre.
Më pas, disa persona ikën në një palestër aty pranë, ndërsa një nga dëshmitarët foli për “të shtëna të rastësishme”.
Hetimet për autorët janë duke vazhduar. Pas incidentit, autoritetet bllokuan zonën përreth pistës së hipodromit, pishinës dhe ambienteve sportive, duke intensifikuar kërkimin për të identifikuar autorët.
Deri më tani, motivet e sulmit nuk janë bërë të ditura, ndërsa as numri i autorëve dhe as rrethanat në të cilat ndodhën të shtënat në ‘rave party’ mbeten nën hetim.
Source: Blick
