Një zjarr masiv me 2 alarme përfshiu laboratorin shkencor në Universitetin e Floridës Jugore St. Petersburg të shtunën në mbrëmje, duke rrezikuar humbjen e shumë kërkimeve prej dekadash.
Zjarri kolosal prodhoi shtëllunga tymi të zi që dilnin nga çatia e Laboratorit të Shkencave Detare, të cilat ishin të dukshme për kilometra larg, raportoi Tampa Bay Times.
“Alarm urgjent. Zjarr i raportuar në MSL, Laboratorin e Shkencave Detare. Evakuoni ndërtesën. Shmangni zonën. Personeli i emergjencës po përgjigjet”, thuhej në një alarm të dërguar në orën 5:57 pasdite nga kolegji.
Mbi 50 njësi të ndihmësve të parë mbërritën në vendngjarje për të luftuar flakët dhe disa kamionë zjarrfikës shkuan në vendngjarje.
Zjarrfikësit u panë duke luftuar flakët ndërsa çatia e ndërtesës u shemb, me mbeturina që shkëputeshin nga pjesët anësore të godinës.
Dekani i Përkohshëm i Asociuar i Kolegjit të Arteve dhe Shkencave në USF St. Petersburg, Frank Biafora, i tha medias se një stuhi elektrike mund të ketë qenë shkaku i zjarrit.
“Kemi anëtarë të fakultetit që kanë laboratorë kërkimorë atje. Kjo situatë duket si një shkatërrim total. Të gjithë kur filloi zjarri kërkonim dhe kontrollonim njëri-tjetrin”, tha Biafora.
Zyrtarët thanë se ndërtesa u evakuua në mënyrë të sigurtë dhe nuk u raportuan të lënduar.
Sipas Biafora, zjarri mund të kishte qenë shumë më i madh.
“Në fakt, jemi mjaft me fat që era po e çon në lindje, sepse kemi konvikte dhe shumë studentë në kampus”, tha ai.
Trajnerja e Lundrimit të USF-së, Allison Jolly, tha se mosha e ndërtesës e kishte bërë atë të ndjeshme ndaj zjarrit, pasi laboratori u ndërtua 80 vite më parë, raportoi Daily Mail.
“Laboratorit ndoshta i mungonin disa nga pajisjet moderne të parandalimit të zjarrit… Është një gjë të kesh pajisje që shkatërrohen, dhe është gjë tjetër të kesh vite të tëra kërkimi që digjen në flakë. Kjo është shumë e trishtueshme”, tha ajo.
