Anija turistike po mban gjithsej 3,116 pasagjerë dhe 1,131 anëtarë të ekuipazhit.
Anija turistike u vu nën mbikëqyrje të shtuar, pasi u regjistrua një shpërthim i ri i sëmundjes gastrointestinale, këtë herë nga norovirusi, një virus shumë ngjitës.
Më shumë se 100 persona u sëmurën gjatë udhëtimit, me raste që arritën në 102 pasagjerë dhe 13 anëtarë të ekuipazhit. Të gjithë treguan simptoma tipike të virusit, kryesisht të vjella të rënda dhe shqetësime gastrointestinale, ndërsa të prekurit tashmë janë izoluar për të parandaluar përhapjen e mëtejshme.
Anija, e operuar nga Princess Cruises, u nis nga Port Everglades në Fort Lauderdale, Florida, më 28 prill dhe pritet të kthehet të hënën. Aktualisht, ajo po lundron pranë brigjeve veriore të Republikës Dominikane, me një ndalesë të planifikuar të dielën në Nassau, kryeqytetin e Bahamas, sipas CruiseMapper.
Incidenti vjen në një kohë shqetësimi të shtuar ndërkombëtar, pasi një tjetër anije turistike po përjeton gjithashtu një shpërthim të hantavirusit. Norovirusi, ndërsa është shumë ngjitës, rrallë rezulton fatal, ndryshe nga hantavirusi, i cili transmetohet më me vështirësi, por përbën një rrezik më të madh.
“Princess Cruises konfirmon se një numër i kufizuar njerëzish raportuan sëmundje të lehta gastrointestinale gjatë udhëtimit të Princess Caribbean nga Port Everglades më 28 prill”, tha kompania në një deklaratë të premten.
“Ne menjëherë vazhduam të dezinfektojmë të gjitha zonat e anijes dhe të forcojmë masat e mbrojtjes së shëndetit gjatë gjithë udhëtimit.”
Siç vëren kompania, një pastrim dhe dezinfektim i plotë i anijes do të kryhet para itinerarit të ardhshëm të planifikuar, por shkaku i saktë i shpërthimit nuk është sqaruar.
Çfarë është Norovirusi?
Norovirusi, i njohur edhe si “virusi i të vjellave dimërore”, shkakton shqetësime të rënda gastrointestinale si të vjella dhe diarre. Ai transmetohet lehtësisht përmes kontaktit të ngushtë me njerëz të infektuar, sipërfaqe, ujë ose ushqim, si dhe përmes ushqimit që është trajtuar nga bartës të virusit. Edhe pse shkakton shqetësim të fortë, simptomat zakonisht zhduken brenda rreth 48 orësh.
Krizë paralele me Hantavirusin në MV Hondius
Në të njëjtën kohë, një rast tjetër shëndetësor është duke u zhvilluar në një anije turistike, MV Hondius të Oceanwide Expeditions, ku më shumë se 140 pasagjerë dhe anëtarë të ekuipazhit mbeten në karantinë për shkak të një epidemie të Hantavirusit.
Pas një qëndrimi të gjatë në karantinë detare në Atlantik, anija tani po shkon drejt Ishujve Kanarie dhe pritet të mbërrijë në Tenerife të dielën. Mbërritja e saj ka shkaktuar reagime nga banorët e zonës, të cilët shprehin shqetësim për një përhapje të mundshme.
Sipas informacioneve të deritanishme, të paktën tre pasagjerë kanë humbur jetën, ndërsa disa të tjerë janë infektuar. Hantavirusi transmetohet kryesisht nëpërmjet thithjes së grimcave të kontaminuara nga jashtëqitjet e brejtësve dhe nuk transmetohet lehtë nga personi në person. Organizata Botërore e Shëndetësisë ka treguar se rreziku për publikun e gjerë mbetet i ulët.
