Tony Blair kritikon Partinë Laburiste për propozimet për t’u ribashkuar me BE-në dhe Net Zero!
Ai tha: “Partia Laburiste po luan me zjarrin; ose, më saktë, me të ardhmen e saj dhe atë të vendit”.
Në një shkrim të botuar nga Instituti Tony Blair për Ndryshim Global, ish Kryeministri kritikon kaosin aktual që ka përfshirë Partinë Laburiste, duke argumentuar se ajo ka një “ndjesi jashtëzakonisht retro të shekullit të 20-të”.
Ndërsa nuk e fajëson “personalisht Keirin” për rënien e popullaritetit të partisë në mesin e legjislaturës, ose dështimin e saj për të komunikuar sukseset e saj ose atë që përfaqëson, Sir Tony argumenton se kjo ndodh sepse nuk ka një “plan të përpunuar dhe koherent për vendin në një botë që ndryshon me shpejtësi”.
Shkrimi i Blair përpiqet të zbardhë gjendjen e vështirë në të cilën ndodhet Partia Laburiste – duke shkruar se ka “pothuajse një kapacitet të pafund për vetëmashtrim dhe nëse vazhdon si ‘Vetëm Laburiste’, rrezikon të ndahet majtas dhe djathtas”.
Ai shpjegon sesi, ndërsa partia mund të përvetësojë vlerat më tradicionale të Laburistëve, një veprim i gabuar mund t’ja tjetërsojë elektoratin në jug të vendit.
Ish Kryeministri indirekt tregon sesi udhëheqësit e partisë nuk kanë mësuar nga mandati i tij si kryeministër, duke shkruar: “Për fat të keq, për pyetjen testuese: si e fitojmë një mandat të dytë të plotë qeverisës – e vetmja përgjigje që duket e përjashtuar, është që të mësojnë nga e vetmja herë në historinë 120-vjeçare të partisë laburiste që e ka bërë ndonjëherë këtë”.
Blair shkruan gjithashtu se: “Është një gjë kur je në opozitë të kënaqesh me këtë iluzion të përhershëm se kur humbasim vende djathtas, vendi në të vërtetë po sinjalizon se dëshiron që Partia Laburiste të lëvizë majtas; është e rrezikshme ta bësh këtë kur je në qeveri”.
Ky mund të jetë një tregues i mundshëm i thashethemeve se Angela Rayner, ish zëvendëskryeministre, mund të bëjë një përpjekje për udhëheqje, e cila politikisht qëndron në të majtë të Partisë.
Kryeministri laburist me shërbimin më të gjatë synon gjithashtu çështje të ndryshme që e mundojnë partinë laburiste.
Ai i drejtohet Brexit-it, duke shkruar: “Ashtu si Brexit-i nuk ishte kurrë përgjigja për sfidat e Britanisë në vitin 2016, përmbysja e tij nuk është përgjigja për situatën shumë më të keqe të vendit në vitin 2026”.
Kjo vjen pasi ish Sekretari i Shëndetësisë Wes Streeting tha javën e kaluar se largimi nga BE-ja ishte një “gabim katastrofal”.
Andy Burnham u tërhoq nga qëndrimi i tij ndaj Brexit-it, duke thënë se do të donte ta shihte Mbretërinë e Bashkuar të ribashkohej me BE-në gjatë jetës së tij, por më pas ndryshoi taktikë duke argumentuar se nuk është e dobishme të përsëriten argumentet e vjetra. Dhe kjo sepse zona Makerfield ku ai po përpiqet të fitojë, votoi 66% në favor të largimit nga BE-ja në vitin 2016.
Ish Kryeministri Blair mbështeti idenë se Mbretëria e Bashkuar duhet të shfrytëzonte sa më shumë burimet e saj, në një përpjekje për të përmirësuar krizën energjitike të vendit, duke i bërë thirrje Qeverisë të braktisë politikën që “i jep përparësi energjisë së pastër, më shumë se energjisë më të lirë”.
Ai shkroi: “Ne duhet t’i japim përparësi energjisë dhe elektrifikimit më të lirë mbi neton zero dhe të përdorim atë që ka mbetur nga burimet tona të naftës dhe gazit në Detin e Veriut.
Më së paku, qeveria duhet të përpiqet të kufizojë efektin e ndryshimeve të bëra dhe, siç kemi argumentuar vazhdimisht, të heqë ato pjesë të axhendës zero neto, që i japin përparësi energjisë së pastër më shumë se energjisë më të lirë; dhe që tani e tutje të sigurohemi që veprimet përputhen me premtimet mbi rritjen ekonomike”.
Ai gjithashtu iu drejtua sfidës së mundshme të lidershipit kundër Sir Keir, duke paralajmëruar se “përpjekja për të detyruar Kryeministrin të largohet”, ndërsa politikat e atyre që vijnë nuk janë përcaktuar “nuk është një mënyrë serioze për të vepruar”.
Blair vazhdoi: “Nëse nuk jeni të kujdesshëm, njerëzit do të votojnë duke menduar se po marrin një version të Partisë së Re (thuajse) Laburiste dhe pastaj në qeveri do të ndiejnë se në vend të kësaj kanë marrë një version të Partisë së Vjetër (thuajse) Laburiste…
Udhëheqja do të përfundojë duke personifikuar zgjedhjen në Partinë Laburiste dhe jo duke zgjidhur çështje të saj.”
Ai bëri thirrje që Partia Laburiste “të bëhet Qendra Radikale”.
Source: GB News
