“Historia është një udhërrëfyes shumë i mirë për ata që nxjerrin mësime prej saj”, shtoi presidenti turk.
Presidenti turk Rexhep Tajip Erdogan nisi kërcënime të reja kundër Greqisë, duke i kërkuar Greqisë të mos vendosë sisteme izraelite kundërajrore në ishujt e Egjeut Lindor, sepse përndryshe Turqia do të godasë.
Konkretisht, presidenti turk, duke folur me gazetarët pas kthimit të tij nga Kirgistani, argumentoi se Greqia duhet të braktisë, siç tha ai, “rrugën e gabuar” dhe të ndalojë armatosjen e ishujve të cilët, sipas kërkesës turke “kanë regjim të çmilitarizuar”.
Deklarata e tij vjen menjëherë pas nënshkrimit midis Greqisë dhe Izraelit të marrëveshjes “Mburoja e Akilit” e cila do të kushtojë mbi 3 miliardë euro.
Një pjesë e madhe e saj do të zbatohet në ishujt e Egjeut.
“Greqia duhet të ndryshojë rrugën e gabuar që ka ndjekur dhe të ndalojë armatosjen e ishujve që kanë status civil”, tha presidenti turk. Erdogani u përpoq gjithashtu ta paraqiste qëndrimin turk si të orientuar drejt ruajtjes së qetësisë në rajon, duke paralajmëruar megjithatë se, Ankaraja nuk do të tolerojë, siç pretendon ai, shkeljet e të drejtave të saj.
“Turqia nuk ka ambicie për territorin e askujt, por nuk do të lejojë askënd të shkelë të drejtat e saj”, tha ai, duke shtuar: “Kushdo që e interpreton qetësinë dhe qasjen e arsyeshme të Turqisë si dobësi po bën një gabim shumë të rëndë”.
Ai nuk harroi të përmendte Historinë, të cilën e paraqiti si një udhërrëfyes për ata që, siç tha ai, nxjerrin mësimet e duhura nga e kaluara.
“Historia është një udhërrëfyes shumë i mirë për ata që nxjerrin mësime prej saj”, tha R.T. Erdogan.
Pas kërcënimeve, ai argumentoi se Turqia do të vazhdojë të kërkojë uljen e tensioneve dhe stabilitetin në rajon.
