Mario Draghi jep alarmin për Bashkimin Europian: “Europa është në rrezik të shpërbëhet. Një Europë që nuk mund të mbrojë interesat e saj nuk do t’i ruajë vlerat e saj për një kohë të gjatë”.
Mario Draghi u dërgoi një mesazh të qartë dhe kumbues udhëheqësve europianë, duke dhënë alarmin për të ardhmen e Bashkimit Europian.
“Një Europë që nuk është në gjendje të mbrojë interesat e saj nuk mund t’i ruajë vlerat e saj për një kohë të gjatë”, theksoi ai, duke bërë thirrje për kapërcimin e përçarjeve kronike që, siç paralajmëroi ai, kërcënojnë vetë kohezionin e Unionit.
Duke folur në Universitetin e Leuvenit, me rastin e doktoraturës së tij të nderit, ish kreu i Bankës Qëndrore Europiane dhe ish kryeministri i Italisë theksoi se Europa është në një udhëkryq historik. Në një botë që po formësohet gjithnjë e më shumë nga konkurrenca midis Shteteve të Bashkuara dhe Kinës, “vetëm europianët kanë potencialin të transformohen në një fuqi të vërtetë”, nëse guxojnë të lëvizin drejt një bashkimi kuptimplotë.
Në këtë kontekst, Draghi paraqiti si një perspektivë të domosdoshme një federatë europiane, të paktën në fushat kryesore të mbrojtjes, politikës së jashtme dhe qeverisjes fiskale. Siç theksoi ai, pa një strategji të përbashkët dhe veprim të koordinuar, shtetet europiane mbeten të ndjeshme ndaj presionit nga lojtarët kryesorë gjeopolitikë.
Ai i vuri theks të veçantë konceptit të “federalizmit realist”, të cilin e përshkroi si një kurs hapash gradualë, por vendimtarë. “Realist, sepse duhet të ecim përpara me ata që janë gati sot dhe në fushat ku mund të bëhet përparim i menjëhershëm. Federalizëm, megjithatë, sepse ajo që ka rëndësi është destinacioni përfundimtar”, vuri në dukje ai, duke e bërë të qartë se qëllimi nuk duhet të humbasë në kompromise individuale.
Në të njëjtën kohë, ai paralajmëroi për iluzionet që ende mbizotërojnë në qarqe të caktuara në Europë. Siç tha ai, ka ende nga ata që besojnë se bota mbetet e pandryshuar ose se lëshimi i autonomisë ekonomike – madje edhe sovraniteti territorial – nuk kërcënon vlerat europiane. “Ky qëndrim nuk duhet t’i ndalë ata që shohin më qartë dhe e kuptojnë nevojën për të ecur përpara”, theksoi ai.
Draghi e paraqiti në terma dramatikë dilemën që, sipas tij, tani po shtrohet në një mënyrë imperative: “A duam të mbetemi një treg i madh, i nënshtruar ndaj prioriteteve të të tjerëve, apo duam të marrim vendimet e nevojshme për t’u bërë një fuqi?” Siç theksoi ai, Europa ose do të zhvillohet në një federatë të vërtetë shtetesh me ambicie gjeopolitike për fuqi, ose do të gjendet e mënjanuar nga zhvillimet ndërkombëtare.
Ai nuk mungoi të theksonte, në fakt, se shumica e shteteve europiane, individualisht, nuk mund të karakterizohen as si fuqi të mesme. Në fushat e mbrojtjes, politikës industriale dhe marrëdhënieve ndërkombëtare, Europa shihet si një entitet i fragmentuar dhe heterogjen, i lehtë për t’u ndarë dhe manipuluar. Ai bëri një referencë të veçantë për kthimin e Donald Trump në Shtëpinë e Bardhë, duke vënë në dukje se Shtetet e Bashkuara tani po deklarojnë hapur se fragmentimi politik europian i shërben interesave amerikane.
Në të njëjtën kohë, ai paralajmëroi për rolin e Kinës, e cila kontrollon lidhjet kritike në zinxhirët globalë të furnizimit dhe është e gatshme ta shfrytëzojë këtë avantazh edhe më shumë.
Pa një lëvizje të shpejtë strategjik, Europa rrezikon të nënshtrohet, të përçahet dhe të deindustrializohet. Ai përfundoi me një frazë që përmbledh ankthin e tij: “Kërcënimi i vërtetë, pas rënies së rendit ndërkombëtar, nuk është boshllëku që krijohet, por ajo që do të vijë për ta zëvendësuar atë”.
