Kryetari i Venecias po shqyrton rritjen e tarifës së hyrjes për vizitorët në lagunë, deri në 50 euro, për të kufizuar mbërritjet gjatë periudhave të pikut turistik.
Kryetari i Venecias, Simone Venturini, ka njoftuar se po shqyrton rritjen e tarifës së hyrjes për vizitorët në lagunë deri në 50 euro, në një përpjekje për të kufizuar mbërritjet gjatë periudhave të “presionit të madh turistik”.
Venturini, një ish konsulent turizmi i cili u zgjodh kryetar bashkie në fund të majit, shpjegoi se masa synon të dekurajojë udhëtarët ditorë gjatë kohëve më të ngarkuara të vitit. Propozimi, tha ai, do t’i paraqitet qeverisë kombëtare për miratim.
Venecia u bë qyteti i parë turistik në botë në vitin 2024 që vendosi një tarifë hyrjeje prej 5 eurosh në 29 ditë të pikut midis prillit dhe korrikut. Në vitin 2025, masa u zgjat në 54 ditë, me dyfishin e tarifës për ata që rezervuan në minutën e fundit, dhe këtë vit mbulon 60 data. Edhe pse masa nuk e ka ulur ndjeshëm numrin e vizitorëve, ajo solli 2.4 milionë euro në arkën e qytetit në vitin e parë të zbatimit – një shifër shumë më e lartë se vlerësimet fillestare. Autoritetet e Venedikut ende besojnë se tarifa do të kontribuojë në planin afatgjatë në trajtimin e turizmit të tepërt dhe në ruajtjen e karakterit të qytetit, i cili është një Vend i Trashëgimisë Botërore të UNESCO-s.
Si funksionon tarifa e hyrjes
Tarifa paguhet elektronikisht, me vizitorët që marrin një kod QR që ua paraqesin inspektorëve në pikat kryesore të hyrjes, siç është stacioni i trenit Venezia Santa Lucia. Ata që kanë rezervuar një qëndrim në hotel, banorët e rajonit të Venetos – nga vijnë shumica e vizitorëve ditorë – dhe fëmijët nën 14 vjeç janë të përjashtuar nga pagesa. Megjithatë, edhe ata që qëndrojnë në një hotel duhet të deklarojnë praninë e tyre në një faqe interneti të veçantë.
“Tarifa e hyrjes është aktualisht i vetmi mjet efektiv për të kontrolluar numrin ditor të vizitorëve”, tha Venturini, duke shtuar se qëllimi është që masa të bëhet më efektive në ditët e pikut, në mënyrë që të arrihet “një ekuilibër i ri midis nevojave të banorëve, punëtorëve dhe vizitorëve”.
Sipas kryetarit të bashkisë, të ardhurat nga tarifa do të ndahen “për të financuar shërbimet komunale dhe mirëmbajtjen e një qyteti unik, të ndërtuar mbi ujë, kostot vjetore të të cilit tejkalojnë 100 milionë euro”.
Source: Corriere della Sera
